Viloyat hokimining qishloq va suv xoʻjaligi masalalari boʻyicha birinchi oʻrinbosari Ulugʻbek Uzaqov Yakkabogʻ tumaniga tashrif buyurib, fermerlar bilan uchrashdi.
Tuman hokimi Lutfiddin Abdullayev ishtirokida oʻtkazilgan uchrashuvda fermerlarga suv resurslaridan oqilona va samarali foydalanish, yerlarning meliorativ holatini yanada yaxshilash, qishloq xoʻjaligi ekinlari yetishtirishda, ayniqsa paxta yetishtirishda suvni tejovchi texnologiyalarni keng joriy etish orqali ularning hosildorligini yanada oshirish lozimligi aytib oʻtildi.
Bundan tashqari fermerlarga tomchilatib sugʻorish tizimi orqali suv resurslarini tanqislik sharoitda kam sarflab koʻp hosil olinishi, ekinlarning hosildorligi 70 foizgacha ortishi va mahsulot sifati yaxshilanishi, suvning oʻsimlik tagiga toʻgʻridan toʻgʻri berilishi, tuproq qotmasligi va mavsumdan soʻng oson haydalishi haqida ham tushuncha berildi.
Shuningdek, Suvni tejaydigan texnologiyalarni joriy qilishdagi mavjud kamchilik va muammolarni bartaraf etish hamda mavjud suv resurslarini suv isteʼmolchilari orasida qatʼiy taqsimlagan holda foydalanish lozimligi boʻyicha ham zaruriy tavsiya va topshiriqlar berib oʻtildi.
