Яккабоғ туманида бир гуруҳ ёшлар етакчилари ҳамда уюшган ва уюшмаган ёшларнинг "Қорабайир" отчилик мажмуасига саёҳати уюштирилди.
Саёҳатдан кўзланган асосий мақсад эса йигит қизларни эгасига содиқ, ҳар қандай вазиятда ҳам мослашувчан қорабайир отлари билан яқиндан таништириш, билим ва тасаввурларини бойитиш ҳамда уларда ватанпарварлик, содиқлик ҳисларини шакллантиришдан иборат бўлди.
Саёҳат иштирокчиларига от парваришидан тортиб, унинг хислатлари, ўзига хос томонлари ҳақида мутахассислар томонидан тўлиқ маълумотлар бериб ўтилди.
Уч минг йиллик тарихга эга бўлган қорабайир отлари эгасига вафодорлиги, ҳар қандай шароит ва муҳитга мослашувчанлиги, чидамлилиги билан ажралиб туради. Жалолиддин Мангуберди, Соҳибқирон Амир Темур, Заҳириддин Муҳаммад Бобур каби буюк аждодларимиз қорабайир отлари билан улкан жангларда зафар қучишган. Ёшларга шу каби маълумотлар билан бирга чавандозлик, от билан дўстлашиш сир-асрорлари ҳам ўргатилди.
