Туман ҳокими бозордаги нарх-наво ва одамлар кайфияти билан қизиқди
Шу йилнинг 20 декабрь куни Президент Шавкат Мирзиёев ҳузурида озиқ-овқат хавфсизлигини таъминлаш, бу борадаги ишларнинг муҳим йўналишларидан бири сифатида балиқчилик соҳасини ривожлантириш ва кооперация асосида балиқ етиштириш самарадорлигини ошириш чора-тадбирлари юзасидан йиғилиш ўтказилди. Унда озиқ-овқат маҳсулотлари таъминотидаги айрим камчиликлар кўрсатиб ўтилди ва мавжуд муаммоларни бартараф этиш, ҳудудларда ушбу турдаги маҳсулотларнинг етарли захирасини шакллантириш ва нархлар барқарорлигини таъминлаш бўйича барча даражадаги ҳокимларга қатъий топшириқлар берилди.
Шунга кўра, бугун Яккабоғ ҳокими Лутфиддин Абдуллаев бошчилигидаги сектор раҳбарлари тумандаги "Истиқлол" озиқ-овқат деҳқон бозорида бўлиб, нарх-наволар билан танишди, сотувчи ва харидорлар билан бевосита мулоқотда бўлди. Озиқ-овқат хавфсизлигини кафолатлаш, нархлар сунъий ошиб кетишининг олдини олиш, айниқса, кундалик озиқ-овқат ва қишлоқ хўжалиги маҳсулотлари захирасини яратиш борасида амалга оширилаётган ишлар яқиндан ўрганилди.
Янги йил байрами арафасида олис маҳалла ва қишлоқларда ҳам арзонлаштирилган савдо ярмаркаларини ташкил этиш бўйича туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари ҳамда туман солиқ бошқармаси бошлиғига тегишли топшириқлар берилди.
