Яккабоғ тумани "К.Ашуров" ҳудуди "Элбой ўғли Шоҳруҳ" фермер хўжалиги даласида жонлиқ сўйилиб,хатми қуръон ўқитилди ҳамда чигит экиш ишлари бошланди.
Семинар тарзида ўтказилган бугунги жараёнда вилоят ҳокимининг қишлоқ ва сув хўжалиги масалалари бўйича биринчи ўринбосари Улуғбек Узақов ҳамда туман ҳокими Лутфиддин Абдуллаев бошчилигидаги барча қишлоқ хўжалиги вакиллари ва фермерлар иштирок этишди.
Жорий йил Яккабоғ туманида чигит экишни ўз вақтида ва сифатли ўтказиш мақсадида, бу йил ҳам мавсумга пухта ҳозирлик кўрилди. 135 та чигит экиш техникалари ва 15 та отрядлар шакллантирилиб, бу отрядларга тажрибали қишлоқ хўжалиги мутахассислар жалб этилди.
–Бу йил тумандаги 295 та фермер хўжалиги томонидан 7300 гектар майдонга чигит экишни мўлжаллаганмиз. Мўл ҳосил етиштиришнинг асосий омилларидан бири навни тўғри танлаш ва ўз вақтида экиш, – дейди туман ҳокимининг қишлоқ ва сув хўжалиги масалалари бўйича ўринбосари Зулқарнай Имомов. – Йиллар давомида орттирилган тажрибага биноан деҳқонларимиз бу йил ғўзанинг “Наманган-77” ва “Порлоқ” навларини экишни режалаштирилган.
