«Мажбурий ижро бюроси Яккабоғ туман бўлими иш юритувчига 2020 йилнинг 18 ноябр куни маъмурий жарима ундириш билан боғлиқ навбатдаги ижро ҳужжати келиб тушди. Унга кўра Н.Х. номидаги «Матиз» автомашинаси 2020 йилнинг 14 сентябр куни тезликни оширганлиги сабабли базавий ҳисоблаш миқдорининг 5 баробари миқдорида (1 115 000 сўм) маъмурий жаримага тортилган. Белгиланган 2 ойлик муддатда жарима тўланмаганлиги сабабли, ИИБ ЙҲХБ томонидан қарздорликни ундириш Мажбурий ижро бюросига ўтказилган», – дейди МИБ Яккабоғ туман бўлими давлат ижрочиси Сарвар Ҳалилов.
Бюронинг Яккабоғ туман бўлими давлат ижрочилари автомашина эгасини бир неча марта огоҳлантирган. Бироқ ҳадеганда қарздорлик бартараф этилмаган.
Жорий йилнинг 6 феврал куни ушбу автомашина бюро иш юритувчилари томонидан хатлаб олинди. Қарздор шундан сўнггина 1 115 000 сўм маблағни зудлик билан тўлаб берди.
