Яккабоғда "Обод қишлоқ" дастурига киритилган "Пахтакор" маҳалласида ариқлар тозаланиб, аҳоли хонадонлари ва дарахтлар оқланди, лой кўчаларга тош тўктирилиб текислаш жараёнлари олиб борилди ҳамда "Яшил йиллик" умуммиллий лойиҳаси доирасида бир қатор мевали ва манзарали кўчатлар экилди.
Шунингдек, бугуннинг ўзида Республика ишчи гуруҳи мазкур маҳаллада бўлиб, маҳалла оқсоқоллари олдида қилинадиган ишлар тўғрисида ҳисобот ҳам беришди.
Маҳаллада дастурга кўра 8,5 километрга яқин тупроқ йўлларга шағал, 3,5 километр йўлларга асфальт ётқизилади. 2 та мактабда реконструкция ишлари олиб борилади.
Ичимлик сув таъминотини яхшилаш мақсадида 1 та сув иншооти қурилади ҳамда 13 км тармоқ тортилади. Шунингдек, 3 та трансформатор ўрнатилиб, таъмирга муҳтож устун ва тармоқлар янгиланади. Аҳоли эҳтиёжига қараб суюлтирилган газ баллонлар билан таъминланади.
